Dous manman

Menm si mwen ta wa
Lè mwen devan ou manman
Mwen t ap mete m byen ba
Paske san ou manman
Mwen pa t ap ka la
Nan zantray ou, mwen te rezidan
Pandan anviwon nèf mwa
Mwen pase yon bon bout tan
M ap tete ou anjwa
Lè m nan bra ou kè m kontan
Lè ou pa la m te bay traka
Tèlman ak santimanman
Mwen santi mwen wa
Lè w absan mwen san pouvwa
Nan men ou tou Dousman
Pou dòmi pran mwen
Avèk bèl ti chan
"Dodo titit manman"
Ou se premye chantez mwen
Nan malèz mwen
Ou se soulajman
Nan maladi mwen
Ou se enfimyè an
Ki pou ban mwen
Premye swen an
Ou se sekirite mwen
Ou pwoteje m nan touman
Ou se avoka mwen
Ou defann mwen nan traka
Lè m dezobeyi ou
Chouchou doudou
Ou jije mwen
Ou voye m kote papa mwen
Pou pinisyon
Lè sa rèd tout bon
Pou mwen, ou mande padon
Pou mwen ou se konseye
Lè ou pale mwen tande
Menm jan Ritchie chante
Chante ki plen senserite ak verite
"Manman se yon djòb ki san konje
Manman pa gen jou ferye"
Se konsa m salye tout manman
Epi mwen bay manman mwen
Yon gwo chay konpliman.
Dous manman mwen renmen w.
Chak jou Bondye fè jou,
M ap konseye tout ti Ayisyen
Pou yo obeyi paran yo
Pou jou yo ka pwolonje.
Se sa labib rekòmande yo.