Dèyè yon gwo touf pengwen
Lòt jou mwen kontre Choukoun
Li souri lè li wè mwen
Mwen di: "O! a la yon bèl moun!"
Li di: "Ou trouve sa, chè?"
Ti zwezo t ap koute nou an lè,
Kan m sonje sa, mwen genyen lapenn
Kar depi jou la, de pye mwen lan chenn!

Choukoun se yon marabou
Zye li klere kon chandèl
Li genyen tete doubout...
A! si Choukoun te fidèl!
Nou rete koze lontan
Jouk zwezo lan bwa te parèt kontan!...
Pito bliye sa, se twò gran lapenn,
Kar depi jou là de pye mwen lan chenn!

Ti dan Choukoun blanch kou lèt.
Bouch li koulè kayimit:
Li pa gwo fanm, li grasèt:
Fanm kon sa plè mwen toutsuit...
Tan pase pa tan jodi!...
Zwezo te tande tou sa li te di
Si yo sonje sa, yo dwe lan lapenn,
Kar depi jou la, de pye mwen lan chenn!

N ale lakay manman li;
Yon granmoun ki byen onèt!
Sito li wè mwen, li di:
"A! mwen kontan sila, nèt!"
Nou bwè chokola o nwa...
Èske tou sa fini, pitit zwezo lan bwa?
Pito bliye sa, se two gran lapenn,
Paske depi jou sa, de pye mwen lan chenn!

Mèb prèt, bel kabann bato,
Chèz woten, tab won, dodin,
De matla, yon pòtmanto,
Nap, sèvyèt, rido mouslin...
Kenz jou sèlman te rete...
Ti zwezo lan bwa, koute mwen, koute!

Zòt tou va konprann si mwen lan lapenn
Si depi jou la, de pye mwen lan chenn!...

Yon ti blan vin rive.
Ti bab wouj, bèl figu wòz,
Mont sou kote, bèl chive...
Malè mwen, li ki lakòz!
Li twouve Choukoun joli
Li pale franse, Choukoun renmen li...
Pito bliye sa, se twò gran lapenn.
Choukoun kite mwen, de pye mwen lan chenn!

Sa ki pi tris lan tou sa,
Sa ki va suprann tout moun,
Se pou wè malgre tan la,
Mwen renmen Choukoun toujou!
Li va fè yon ti katwon...
Ti zwezo gade! ti vant li byen won!...
Pe! fèmen bèk zòt...
Se twò gran lapenn!
De pye piti Pyè, de pye li lan chenn!

Gade vèsyon fransè a



(1884, Mizik Mauléart Monton)

(Vèsyon orijinal) Dèiè yon gwo touff pingoin
L'aut'jou, moin contré Choucoune ;
Li sourit l'heur' li ouè moin,
Moin dit : "Ciel ! a là bell' moune !"
Li dit : "Ou trouvez çà, cher ?"
P'tits oéseaux ta pé couté nous lan l'air...
Quand moin songé ça, moin gagnin la peine,
Car dimpi jou-là, dé pieds-moin lan chaîne !"

Choucoun' cé yon marabout :
Z'yeux-li clairé com' chandelle.
Li gangnin tété doubout,...
- Ah ! si Choucoun' té fidèle !
- Nous rété causer longtemps...
Jusqu' z'oéseaux lan bois té paraîtr' contents!...
Pitôt blié ça, cé trop grand la peine,
Car dimpi jou-là, dé pieds moin lan chaîne !

P'tits dents Choucoun' blanch' com' lait'
Bouch'-li couleur caïmite ;
Li pas gros femm', li grassett' :
Femm'com' ça plai moin tout d'suite...
Temps passé pas temps jodi !...
Z'oéseaux té tendé tout ça li té dit...
Si yo songé çà, yo doué lan la peine,
Car dimpi jou-là, dé pieds moin lan chaîne.

N'allé la caze maman-li ;
- Yon grand moun' qui bien honnête !
Sitôt li ouè moin, li dit :
"Ah ! moin content cilà nette !"
Nous bouè chocolat aux noix
Est-c'tout çà fini, p'tits z'oéseaux lan bois ?
- Pitôt blié çà, cé trop grand la peine,
Car dimpi jou-là, dé pieds moin lan chaîne.

Meubl' prêt', bell' caban' bateau,
Chais' rotin, tabl' rond', dodine,
Dé mat'las, yon port'manteau,
Napp', serviette, rideau mouss'line...
Quinz' jou sèl'ment té rété...
P'tits oéseaux lan bois, couté-moin, couté !...
Z'autr' tout' va comprendr" si moin lan la peine,
Si dimpi jou-là dé pieds-moin lan chaîne...

Yon p'tit blanc vini rivé :
P'tit' barb' roug', bell' figur' rose ;
Montr' sous côté, bell' chivé...
- Malheur moin, li qui la cause !...
Li trouvé Choucoun' joli :
Li parlé francé, Choucoun' aimé-li...
Pitôt blié ça, cé trop grand la peine,
Choucoun' quitté moin, dé pieds-moin lan chaîne !

Cà qui pis trist' lan tout ça,
Cà qui va surprendr' tout' moune,
Ci pou ouè malgré temps-là,
Moin aimé toujours Choucoune !
- Li va fai' yon p'tit quat'ron...
P'tits z'oéseaux, gadé ! P'tit ventr'-li bien rond !...
Pé ! Fémin bec z'autr', cé trop grand la peine :
Dé pieds pitit Pierr', dé pieds-li lan chaîne !
(1884)
Gade vèsyon fransè a

Comments (0)